紅魔唔扑錘副選捱細界

猪拉多纳

今晚英格蘭足總盃第三圈尾場，曼聯作客「錘仔」韋斯咸，雙方踢完聖誕快車，球員難免身心俱疲，轉戰盃賽正係抖氣時候。尤其紅魔鬼根本志不在足總盃，估計領隊費格遜或會派二線兵出戰，小心大熱倒灶。韋斯咸自知同曼聯鬥攻只會自取滅亡，必然以穩守行先，伺機偷襲，寧博2.2倍細盤。（now 633及660周日凌晨1時15分直播）

曼聯喺快車期間演出Sharp醒，但唔代表踢足總盃亦有相同發揮，事關費Sir眼中只有英超及歐聯，一向忽視本土兩項盃賽，賽事初步階段多數派副選應戰。更何況剛經過英超快車，冇理由再要尹佩斯等猛將繼續搏殺，一旦踢殘佢哋，影響聯賽同歐聯爭標，盞得不償失。另外，費Sir近期銳意改善防守，效果顯著，今季聯賽首次連續兩場保持清白之身，要抵禦韋斯咸攻擊，綽綽有餘。
韋斯咸守曼聯有心得

韋斯咸靠晒中場路蘭入波，進攻板斧好有限，導致入球數字長期偏低。慶幸防守不俗，聯賽失波仲少過曼聯，領隊艾拿戴斯自然識盡量發揮球隊防守強項同紅魔鬼周旋。事實上，韋斯咸喺個幾月前聯賽作客奧脫福亦只係僅敗0比1，今次主客互調，曼聯更難咬得入佢哋。
車仔第三圈勝率80%

曼聯史上曾11次奪足總盃冠軍，屬於各隊之冠，車路士7次捧盃僅次於曼聯、阿仙奴及熱刺。講到兩軍近十屆英足盃第三圈成績，則以車仔較佳，錄得8勝2和，近三屆都係大勝，共轟入16球兼保持不失，水準非常穩定。
曼聯遇弱愈弱

至於曼聯近十屆英足盃第三圈取得7勝2和1負，唯一敗仗係三年前，0比1不敵當時仲係甲組仔嘅列斯聯，令人大跌眼鏡。另外，紅魔鬼分別於05及06年第三圈遇上低組別球隊埃克塞特及伯頓，只能互交白卷，需要靠重賽贏波先至晉級。不過曼聯過去兩屆對英超名牌利物浦及曼城就順利贏波晉級。
曼聯近10屆足總盃第三圈成績(不計重賽)

球季 戰果(半場)

2012 客勝曼城3:2(3:0)

2011 主勝利物浦1:0(1:0)

2010 主負列斯聯0:1(0:1)

2009 客勝修咸頓3:0(1:0)

2008 客勝阿士東維拉2:0(0:0)

2007 主勝阿士東維拉2:1(0:0)

2006 客和伯頓0:0(0:0)

2005 主和埃克塞特0:0(0:0)

2004 客勝阿士東維拉2:1(0:1)

2003 主勝樸茨茅夫4:1(2:1)

總計：7勝2和1負