貝迪斯夠薩

猪拉多纳

西甲Fight Back

今晚西甲歇冬後重開，由打頭陣的薩拉戈薩主場對貝迪斯揭開戰幔，前者近四輪聯賽搶到七分，狀態確實唔錯，但食得太飽慎防回吐跣你一鑊，論實力貝迪斯始終勝一籌，加上有薩軍剋星魯賓卡斯度壓陣，「綠白軍」贏埋都仲得，「讓球客勝」穩開冇甩拖。

（now 632周六凌晨4時30分直播）

有睇開西甲嘅球迷，都知道薩拉戈薩唔會打冇把握嘅仗，佢哋寧願收起主力畀勁旅大炒，對住同級球隊必有的放矢盡砌，之前更作客連勝畢爾包同華歷簡奴，近四場聯賽勁擸七分，令佢哋拋離護級區域成七分。不過，呢類兵源有限嘅中型班，志在唔使降班，依家積分有啲鬆動之下，隨時玩嘢唔奇，今仗續有守將阿當賓達及艾雲奧巴杜域因傷倦勤，防線存有隱憂。
魯賓卡斯度薩軍剋星

今季異軍突起嘅貝迪斯，喺主帥梅爾英明領導下，依家位列第五，只係爭第四嘅馬拉加三分，有力爭逐歐聯參賽資格。呢支「綠白軍」的確臥虎藏龍，中場指揮官比納特攻守兼備，現已成為西班牙國家隊常客，而箭頭魯賓卡斯度現有九球進帳弗到震，呢位大器晚成嘅射手，對親薩拉戈薩腳風特別順，近三次出戰薩軍轟入三粒。睇番紀錄，貝迪斯近六次對薩拉戈薩，只係輸過一場，擺明係格食格喇，加上歇冬前該隊對馬略卡時，因球證發雞盲錯判十二碼，搞到全失三分，球員谷埋成肚氣，誓搵薩拉戈薩洩憤，今場仲有得受讓咁筍，斯維強捧「讓球客勝」。