赫斯誓響新「年」頭炮

猪拉多纳

今晚蘇超獨腳戲有赫斯主場迎戰喜伯年，儘管赫斯財政不穩，但難得班球員同Fans照樣不離不棄上下一心，有望掃走踢到殘嘅喜伯年，打響2013年第一炮！（now638台周五凌晨3:45直播）
喜伯年12日4場踢到殘

球迷喺聖誕新年快車睇波睇餐飽，可憐班球員就踢到殘。好似喜伯年咁，上場惡戰些路迪初段偷雞得手，之後成場畀些路迪撳住嚟砌，捱足全場消耗甚大，今晚仲要係佢哋12日內打嘅第4場，你話唔腳仔軟都冇人信！

至於上輪因場地積水取消嘅赫斯，今晚就喺自己地頭以逸待勞，每人跑多兩步都足以砌低喜伯年。雖然赫斯近期陷入財困危機，但一班球員都團結一致願意遲出糧，而球迷就入股救亡，認真有情有義。為咗答謝Fans同吸引更多人注資，今場點都要打場好波。再者，嚟緊轉會市場又重開，如果球員想跳船走人，嚟緊肯定會加多兩錢肉緊博畀其他球會睇中，今仗仲唔係騷哥利嘅大好時機。

更重要係赫斯對住喜伯年有格食格味道，兩軍近10次交手，赫斯贏咗7次，對上4次主場仲全部贏晒，加上有前鋒約翰塞頓、中場賴恩史堤芬臣復出，可以話更添勝算。