紅魔新年「大」有斬獲

猪拉多纳

豆腐防線撼韋根唔攻就笨

新年快樂！2013年元旦日有曼聯作客對韋根嘅英超大戰，睇波之餘阿占祝大家衰運無晒新年行大運！人哋話新年新氣象，不過曼聯條豆腐防線相信短期內都唔會有咩改善，今晚作客韋根繼續要靠尹佩斯帶住隊友數胡，以強大火力彌補脆弱防守，捧入球大抵玩過曼聯客勝啦！

（有線200及300、廣東體育周二晚11:00直播）
曼聯14場作客得1場不失

唔講唔知，曼聯依家嘅失球數字竟然高過史篤城差唔多一倍，依家佢哋喺榜首一枝獨秀真係有啲難以置信，但事實係曼聯有條世界數一數二嘅超強鋒線，英超神射手尹佩斯當然唔使講，即使朗尼受傷可能要抖3星期，不過韋碧克同查維亞靴南迪斯呢班後備殺手都一樣有料到，而且佢哋要爭上位，仲唔趁朗尼受傷搏老命咩？最衰係紅魔條防線真係爭唔落，鬧咗幾百次都要再鬧，全季14場作客得1場係零失球，韋根入番一、兩粒係好正路呀！
韋根遇勁旅同樣進取

韋根今季表現當然渣到痹，雖然剛剛叫贏咗維拉，但大家都知維拉近期硬仗連場踢到殘，贏到都冇咩大不了，講真降班好大機會有韋根份。不過佢哋班球員其實有一定個人質素，祖迪高美斯、干尼、馬隆尼、迪山度都係好波之人，最重要係韋根領隊馬天尼斯踢法進取，對住勁旅都冇話死守，今晚偷雞入曼聯波唔係咁難，買1.52倍入球大至划算。
頂占筍盤：韋根（入球大）