水手無敵主場埋齋

猪拉多纳

除夕澳職一二哥分途出擊，頭場榜首中岸水手主場對珀斯光輝，水手近期成績走樣，好大程度上因為連番作客，佢哋今季主場仍然保持五戰全勝，返回自己地頭係時候重敲勝鼓。光輝欺善怕惡，遇上強隊預料會束手就擒，簡單要水手1.7倍主勝。

（有線64及204台周一下午3時直播）

水手近兩仗作客失分，先被威靈頓鳳凰逼和1比1，及後0比1不敵FC悉尼，但其實佢哋呢兩場表現都唔差，只係未能好好把握埋門機會，最終末段失波飲恨。水手根基仍雄厚，只要保持信心，相信可以迅速復甦。尤其係佢哋屬於今季澳職唯一主場全勝球隊，可憑地利之助重回正軌。
FC悉尼回勇值追

珀斯光輝雖然近三場取得二勝一和，但兩場勝仗對手只係下游球隊，上仗主場鬥西悉尼流浪者，僅於臨完場前逼和對手，欠缺說服力。再睇往績，單計常規賽，光輝近五次作客水手錄得一和四負，被對方食住難發圍。

另一場次席阿德萊德聯主場對FC悉尼，阿軍近期跌晒Watt，繼慘敗畀流浪者1比6後，上仗主場又輸畀當時作客未贏過嘅獅吼，實在讓唔起。FC悉尼雖有迪比亞路受傷缺陣，但佢哋逐漸回勇，今場受讓半一，一於要下盤。（有線64及204台周一下午5時直播）