飛腳 鹿角驚輸冷敲2.45倍細

猪拉多纳

大阪飛腳、鹿島鹿角兩大日本褪色豪門，今日响天皇盃4強交鋒，都有想贏怕輸嘅心態，喺靜岡個中立場較量，未必敢放開手腳對攻，2.45倍入球細咁好分，值得冷敲！（now711台、有線148周六中午12:00直播）

天皇盃係今季日職賽事最後一項錦標，又係爭取亞冠盃席位嘅最後機會，飛腳、鹿角當然會流晒口水，想捧盃氹班Fans高興，但係呢兩班波今季戰績遠遜預期，飛腳仲衰到降落日乙，聯賽一收咧，上層就宣布人事變動，當中飛腳確定下季由長谷川健太取代松波正信做監督，甚至連守門員教練都換埋；鹿角嗰邊亦Call咗昔日主帥施里蘇返嚟，準備代替佐真奴揸旗。所謂一朝天子一朝臣，隊波未來係點冇人知，兩邊都有啲球員準備轉飯鑊，例如鹿角中場增田誓志，就同柏雷素爾眉來眼去，兩隊波嘅凝聚力都唔及以前。
箭頭李安度蒙迪拉坐波監

當然，差一步就入到元旦日嘅決賽，佢兩隊唔會唔搏，問題係飛腳件箭頭李安度蒙迪拉坐波監，今日可能要用中場家長昭博打前鋒，連續兩場天皇盃有波入，畀人形容係「天皇盃男」嘅遠藤保仁又目標太大，好易畀鹿角針對性凍結，飛腳想入波冇咁易。

鹿角嘅情況好過飛腳一啲，起碼佢哋喺季尾7戰不敗，但係睇番自06年起，呢隊堅持走森巴風格嘅波，响盃賽5戰飛腳，只係開咗3大2細，顯而易見逢盃賽就變得慎重好多，更加無好似聯賽對戰咁，開啲4:1、5:0、5:1嘅瘋狂波膽，今次兩隊衰波好驚輸，以免兩手空空收咧，呢場日本「國家打吡」入球細有得諗o架！

天皇盃賽制：現為4強階段，法定時間內打和將加時30分鐘，未分勝負則互射12碼決勝。