曼城死火撐唔「諾」

猪拉多纳

耶耶托尼認畀對手睇通

英超繼續踩行油開快車！「金絲雀」諾域治雖然連場失利，不過今晚再喺主場出戰，唔使舟車勞頓之外，對手仲要係前線集體死火嘅曼城，卡爾萬睇好呢隻硬淨嘅「地頭雀」至少唔使輸，受讓1球嘅2.65倍「讓球主勝」要撐！ （有線201及301周六晚11:00直播）
諾域治地頭 低過「雙紅」

諾域治作客不敵西布朗後，跟手主場對車路士亦輸波，讀者對佢哋難免會有所保留。但查實睇真啲，不擅作客嘅諾域治只係輸畀西布朗1粒，對住狀態反彈、之前兩場喪入13球嘅車仔，最終亦僅輸0:1，可謂雖敗不辱。佢哋係就係板櫈深度唔多夠，不過今晚好在冇新傷兵，兼夾喺快車賽程唔使四圍頻撲繼續主場出擊，之前「雙紅」曼聯同阿仙奴嚟到都要擺低晒3分，硬淨到咁都捧唔過？

另邊廂嘅曼城輸畀新特蘭後，領隊文仙尼都大嘆隊波鋒力疲弱，話唔排除學西班牙打「無鋒」陣式喎。事實上，泰維斯同阿古路近7場聯賽各自得1球進帳不特止，後備殺手迪斯高仲遇上長達8場嘅入球荒，又難怪佢咁頭痕嘅。入唔到波固然係問題，不過耶耶托尼喺英國《太陽報》更講出曼城嘅致命傷：「上季係有好多驚喜畀大家，但係今年對手已經睇通晒我哋嘅打法。」跟手仲話要行「Plan B」求變喎，講就咁講，霎時間點樣話變就變呀，睇怕佢哋今晚隨時又再失分。