紐卡素大舉起革命

猪拉多纳

東北倫敦雙城戰 阿仙奴快攻打壓

英超快車期第三站上演「東北倫敦雙城戰」，兩支倫敦死敵阿仙奴及熱刺分途出擊，兩軍同樣面對「東北兵」，兵工廠主場對紐卡素，熱刺則作客新特蘭。其中紐卡素上仗作客曼聯僅輸3比4，踢出今季客場代表作，承接勇勢作客酋長球場本望再有一番作為，可惜傷患問題惡化，撞正抖足一星期嘅阿仙奴冇着數，既然「喜鵲」入得失得，一於追大。

（有線300及200台周日凌晨1時30分直播）

阿仙奴原本於拆禮物日主場對韋斯咸，但受倫敦地鐵工潮影響延期補賽，英超列強要喺十一日內連搏四場，兵工廠反而有得抖足一星期，着數好多！阿仙奴中場路斯基及中鋒基奧特有傷上陣成疑，兩人都非必然正選影響唔大，最緊要弗爆中場辛迪卡索拉打得，另外禾確特近期擔正打前鋒效果理想，今次可繼續拍住普多斯基同阿歷士張伯倫組成三叉戟，實行以快打慢。
阿仙奴抖足一周好着數

紐卡素近期內訌，結果由「法語系」擊敗「阿根廷幫」揸旗話事，上場作客奧脫福對曼聯即有貨交，三度領先下僅在完場前輸3比4，可謂有晒交代。今場作客英超「傳統法國幫」阿仙奴，本有望起「法國革命」，可惜傷患問題惡化，中場安尼達更勇戰受傷無望披甲，其他傷兵包括中場卡比耶、丹高士寧、約拿斯古迪利斯、守將史提芬泰萊及賴恩泰萊等，另一主將賓艾化亦有傷，加上中堅米克威廉臣停賽，今場要起用馬維奧斯及奧巴坦等後備兵，防守力勢必打折扣，幸好前線仲有「黑雙煞」丹巴巴亞同柏比斯施斯爭取士哥，大盤仍然有保證。

計埋上場輸畀曼聯，紐卡素連續五場作客輸晒，今季客場亦未贏過，睇績確係趕客，不過翻查往績，兩隊近九次碰頭七場開大，今戰玩入球大好過玩主W！