英超Boxing Day 紅魔送「大」禮

猪拉多纳

今日拆禮物日，阿占同各位《太陽報》讀者補講聲聖誕快樂先！每年聖誕嘅其中一個節目，當然係睇英超快車啦！今晚嚟到「快車第二站」，就有場曼聯對紐卡素，呢場波大細中位數雖然去到3.5球，不過「紅魔」殺神朗尼同尹佩斯無堅不摧，紐卡素亦有丹巴巴亞博轉會開殺戒，一於撐兩軍鬥攻，送份2倍「大」禮畀球迷啦！

（有線200及300、廣東體育周三晚11:00直播）
紅魔或變陣「三箭齊發」

曼聯今季火力驚人，8場英超地頭出戰，竟然有7仗入兩球或以上，尹佩斯同朗尼嘅合作愈嚟愈好，根本唔愁冇波入。而且阿占收到消息，話費Sir喺快車期間一定會玩輪換，賽前大軍名單，右翼路爾斯華倫西亞連後備都冇，而拿尼又被雪藏，即係話曼聯今仗好可能會變陣，部分英國傳媒吹到行一行，話「紅魔」今仗會「三箭齊發」，尹佩斯同朗尼去兩邊，中間用查維亞靴南迪斯打正中鋒，若然係真，呢場波真係分分鐘開「7+」都似！

大家咪誤會呀，阿占唔係話紐卡素會好似維拉咁畀人數8粒，而係覺得曼聯隨時失番2、3球！事關曼聯8次喺英超主場出戰，只得一場冇失過波，其中7場就同對手互片開出「入球大」，而且上文講過「紅魔」今仗個陣好可能係全攻型，咁搞法，入波又點會少呀？
紐卡素巴亞騷哥利博轉會

係，對家紐卡素傷兵滿營，賓艾化、卡比耶等靈魂人物全部唔出得，班波近期仲輸到麻木晒，唯一最有火嘅就係射手丹巴巴亞，呢位塞內加爾球星極可能喺1月轉會，「喜鵲生涯」進入倒數階段，丹巴巴亞要博阿仙奴、利物浦等潛在買家賞識，近期開行Turbo數胡，咪忘記上季佢兩鬥曼聯都有士哥，球迷們今晚一於買定花生，等睇入球騷啦！
頂占筍盤：曼聯（入球大）