車仔兵疲難有作「維」

猪拉多纳

臨近聖誕節，「張峰」喺度先同大家講聲Merry Christmas！講番波經，啱啱失落世界冠軍球會盃嘅車路士，今晚重返英超喺史丹福橋球場迎戰阿士東維拉。雖然「藍戰士」上周中英聯盃大勝晉級重返勝軌，但自從暫代主帥賓尼迪斯接手後，成班波表現飄忽，實在不宜沾手。相反維拉經過季初摸索期後，表現漸入佳境，上輪作客擊敗利物浦一仗更加實至名歸，今晚就算作客都唔會輕易就範，3.5倍「讓客」值得捧場。

（有線200及300、廣東體育周一凌晨0:00直播）

車路士踢一踢世冠盃要往返歐洲同亞洲，路程遠都唔在講，仲要一致被睇好下屈居亞軍，士氣難免受挫。無疑賓尼迪斯上任後，「王子」費蘭度托利斯狀態係好咗，漸漸搵番射門觸覺之餘，同隊友默契亦都轉好，但賓帥所排嘅陣容大致上都係用嗰12、13個球員，就算英聯盃對住英冠球隊列斯聯，都用上大半隊正選，要同一班球員應付咁頻密嘅賽程似乎極辛苦，嚟緊「聖誕快車」能唔能夠保持喺高水平演出，亦係一個疑問，今晚面對擅踢穩守突擊嘅維拉，隨時老鼠拉龜。
維拉防守夠硬淨

另邊廂嘅維拉今季銳意改革，成班波好似新埋班一樣，導致季初成績未如理想，仲一度跌落降班漩渦。不過隨住前鋒賓迪基冒起，戰績得以改善，近5場聯賽2勝3和保持不敗，當中仲不乏摸和阿仙奴同擊敗利物浦兩支前「Big4」球隊。其實除咗賓迪基喺前線攻堅，維拉中後場防守聯繫緊密，包抄補位做到足，亦往往令強隊咬佢哋唔入。今晚維拉受讓一球係「張峰」信心之選。
「藍戰士」主場4戰不勝

‧車路士最近4場聯賽主場未贏過，只得3和1負成績。

‧「藍戰士」喺11月嘅聯賽主場入球寥寥可數，只有1球進帳。

‧維拉近5場錄得2勝3和不敗，當中3場更保持清白之身。
車仔啞火吼半場細

車路士雖然大炒列斯聯晉級英聯盃4強，但自從喺史丹福橋球場輸畀曼聯之後，成個11月嘅主場聯賽都未贏過波，箇中原因同班球員啞火不無關係，淨係得泰利入過1球，相反維拉防守亦愈見硬淨，不妨玩吓1.62倍半場入球細。
張峰來料：阿士東維拉（讓客）