曼聯迎快車先歎魚生粥

猪拉多纳

歐聯上周中雖然已經抽籤，但就有被質疑造假餘波，因為抽籤結果居然同綵排時一模一樣。姑勿論係咪造假定係巧合，作為球迷嘅我就最想睇好波，無論係巴塞對AC米蘭定係曼聯撼皇馬，話題性十足，總好過強弱對壘了無新意。不過距離下輪歐聯仲有兩個月時間，經驗豐富嘅費格遜一定知道呢段係聯賽搶分好時機，只要一心一意專攻聯賽拋離對手奠定勝局，日後喺歐聯比賽亦事半功倍。
遇史雲斯小勝啱數

以聖誕快車賽程嘅講，曼聯今輪作客史雲斯算係難踢嘅一仗。以實力計，曼聯肯定喺史雲斯之上，但史雲斯呢班波踢起上嚟好硬淨，今年主場更加和到利物浦同車路士，紅魔鬼呢次未必可以輕鬆取勝。要令對方束手無策，曼聯今仗後防一定要滴水不漏，好在尼曼查維迪經已復出，而且莊尼伊雲斯又簽咗新約，肯定士氣大振。另外拿尼同香川真司已經重返操練場，但應該無咁快畀佢哋冒險出場，因為費格遜手頭上仲有好多中前場精兵，除咗一向踢得好嘅尹佩斯之外，佢拍檔朗尼呢排亦踢得順番好多。

對手米捷係曼聯防線絕對要提防嘅史雲斯尖力，呢位西班牙前鋒只值兩百萬鎊轉會費，但今季喺英超發光發熱，更射入十二個聯賽入球，與曼聯尹佩斯排行神射榜前列，性價比甚高。米捷特點係捕位靚及埋門準，但若然紅魔可以睇實呢位射手，可以大大降低史雲斯嘅攻力。要作客史雲斯始終都係硬戰一場，而且曼聯之後仲有一連串快車要應付，相信費格遜唔會要求球隊大勝，最重要係以最不費氣力、啱啱好拎三分走就啱晒，所以大細注客勝同讓球主客和和局亦值一博。
Kit 推介：曼聯客勝、讓球和