鹿角撞散市原

猪拉多纳

日職盃王夫添砌乙組仔

天皇盃八強戰展開，日職球隊包辦七席，日乙大軍千葉市原級數最低，八強鬥日職盃王鹿島鹿角仲要冇埋主場優勢，賽事於東京味之素體育場上演，鹿角決心爭盃向球迷交代，佢哋質高一籌，今次夫添出擊贏面好高，一於捧客勝！

（周日下午2時開賽）

千葉市原能夠殺入八強戰，主要因為抽好籤賽程易踢，佢哋對上三圈對手分別為JFL（日本第三級別聯賽）球隊長崎成功丸、佐川急便滋賀同地區球隊福島聯，晉級過程未受太大考驗。市原攻擊主力藤田祥史、田中佑昌及兵動昭弘等人喺日乙超超哋，不過今場對手鹿角級數唔同，加上市原冇埋主場優勢，恐怕今戰會全場捱打。

鹿島鹿角係10/11年度天皇盃冠軍得主，史上曾經四奪天皇盃，佢哋今年喺聯賽盃成功奪冠，但聯賽成績令人失望，若想出戰下屆亞冠盃，一定要捧走天皇盃，今次全軍上下都會搏盡爭標。鹿角冇傷停問題，三大巴西外援連拿度卡查、沙治奧杜查同祖尼奴都可候命，加埋土炮前鋒大迫勇也幫手，有足夠火力搞掂市原！
松鼠夠韌力「+1」筍

同日大宮松鼠喺熊谷文化公園陸上競技場鬥柏雷素爾，個場位處埼玉縣，松鼠不時喺呢度作賽，熟晒架步，呢班波下半季護級打到曉飛，上次輸波已經係八月尾，十六強對川崎前鋒半場落後三球都能反勝對手，足見佢哋個勢好勁，隊中王牌射手路華高域打過德甲，轉戰日職惡到暈，今次受讓有利，要「讓球主勝」！