雙雄「勝」誕願望 車仔大起維拉

猪拉多纳

平穩度過世界末日後，話咁快聽日就係平安夜喇，英超聖誕快車殺到埋身，雙雄曼聯同車路士今晚分途出擊，「紅魔鬼」作客火併史雲斯，主帥費格遜力求搶晒三分提早送份聖誕禮物畀班「魔粉」；至於車仔就喺主場迎擊阿士東維拉，備受壓力嘅教頭賓尼迪斯希望可以贏波同車迷齊齊歡度佳節！

英超名牌車路士快車期首戰主場對阿士東維拉，車仔剛於盃賽大勝重拾信心，隊內進攻球員上晒力，教頭賓尼迪斯一改保守作風，希望盡數對手振奮士氣，大軍近季經常喺主場同維拉合演入球騷，今場投X首選大盤！

（有線300及200台周一凌晨零時直播）

失意世冠盃後，車路士上仗喺聯賽盃搵英冠仔列斯聯出氣，佢哋半場落後一粒，換邊後狂轟五球反勝，三大進攻重心桑馬達、夏薩特同費蘭度托利斯都有士哥，論狀態佢哋絕對唔差，中前場球員好弗，衰在後防不穩，今戰續有隊長泰利養傷，防線仍難予人信心。賓帥接手後執唔掂後防，索性叫班波以攻代守，目的係以大勝提升球員信心，佢哋近六戰五場開大，絕非偶然。
維拉弗爆鬥駁火

阿士東維拉近期都好弗，對上兩戰全勝轟入七球，包括上輪作客擊敗利物浦，表現好對辦。主帥林拔全面實行年輕化政策，以賓迪基取代大牌前鋒戴倫賓特擔正攻堅，事實證明呢個決定非常正確，依家賓迪基愈踢愈好，上場對利物浦梅開二度勁搶鏡，佢個拍檔安祖斯韋文腳風都好順，兩人上場合作入咗球靚波，默契一流，成班生牯仔打起信心，今次作客車仔唔會齋守求和。

車路士快車期賽程唔易踢，嚟緊仲要作客諾域治同愛華頓，兩場都係硬仗，今場肯定想拎三分打定底先，不過，維拉個勢都唔弱，呢場主勝偏熱唔抵玩。翻查往績，車仔近六次主場對維拉五場開大，包括2010年大勝七比一，但佢哋近兩季都贏唔到，今次捧大較穩。