熱刺上齊架生 攻陷史篤城

猪拉多纳

熱刺今季靠保亞斯領軍衝擊前四，經過季初摸索期後，熱刺終於上力，近6戰贏5場轟入13球，單係射手迪科爾就包辦5粒，今晚英超，佢哋會喺主場迎戰近況回落嘅史篤城，進取啲博2.48倍「讓球主勝」。

（有線201及301周六晚11:00直播）
加里夫巴利 戴臣復操

唔經唔覺，熱刺已經同前列球隊交晒手，嚟緊聖誕快車，佢哋嘅對手全部都係中下游分子，爭前4形勢大好。久休嘅中場悍將柏加上仗已後備上陣，預期呢位前英格蘭足球先生會慢慢回歸正選，主力加里夫巴利、中堅戴臣亦已復操，今仗可望齊齊復出，大大提升熱刺嘅攻守能力。除咗迪科爾，丹普西、艾迪巴約、艾朗連儂等人近幾場亦輪住開火，史篤城Mark得邊個？

最重要係史篤城近況回落，聯賽2連和，中場查理阿當早前回國奔喪，即使今場出到亦只怕患得患失。值得留意嘅係史篤城人腳唔似熱刺咁充裕，要喺11日內應付4場英超比賽，肯定要有取捨。史篤城今仗已有守將馬克威爾遜因傷缺陣，與其今場搏盡，倒不如留番啲力喺主場搶分好過。