曼城雙星玩殘雷丁

猪拉多纳

泰維斯+阿古路=13戰全勝！

世界冇末日，禮拜六梗係要留喺屋企睇波啦！今晚英超快車第1站，曼城喺主場迎戰包艇嘅雷丁，文仙尼早排搞到「藍月亮」歐聯出局，仲因為袒護「巴神」被高層警告，但大難不死必有後福，佢家陣終於狠心棄用「契仔」，復用阿古路拍泰維斯呢對「必勝組合」，就算開到「-2」，小妹都照捧1.9倍「讓主」！

（有線200及300、廣東體育周六晚11:00直播）

唔少人插文仙尼領軍唔掂，但傻人有傻福，曼城官網日前仍然力撐早前矢言重奪英超嘅文帥，公布唔少有利數據，包括佢領軍嘅114場英超贏咗70場，勝率有61.4%；而且「藍月亮」喺文仙尼領軍下，喺聯賽只係試過1次2連敗，擺明係想幫佢造勢喎！
文帥靚牌勁多 一世夠運

好喇，家陣「巴神」終於冇碇企，文帥焗住用番泰維斯踢正選，其實呢個係一大喜訊，事關「泰仔」同阿古路呢對阿根廷孖寶拍住正選嘅13場英超賽事，曼城係全部贏波而回，今鋪對住已經連輸6場嘅雷丁，唔係炒唔到呀？小妹不嬲都覺得文仙尼吉星高照，皆因佢除咗有世界級嘅「阿泰組合」，仲有迪斯高呢位自上季起就成為全英超入球效率最高嘅球員，平均每104分鐘斬獲1球，加埋「後上王」耶耶托尼，又邊使驚數唔夠先？
雷丁射手預咗抬蛋過聖誕

反觀開季至今只贏過1場聯賽嘅雷丁，近3戰即使作客弱旅亦吞蛋收場，上仗喺主場出擊，仲衰到畀阿仙奴炒2:5添！雷丁嘅積分到家陣都仲係得單位數，分分鐘提前10輪8輪降班，難怪射手普格恩耶克心都灰埋，話今鋪已經準備好抬蛋喇！
雷丁唔識守傳中波

‧曼城射門次數冠絕英超，雷丁則係歐洲5大聯賽中「被射」最多嘅球隊。

‧雷丁係英超控球率最低嘅球隊，僅得40%。

‧雷丁今季有11次被對手靠傳中入波，數目係英超之冠。