馬體會同巴塞鬥攻冇着數

猪拉多纳

本周最矚目嘅西甲大戰，首推巴塞主場對馬體會，主隊一方面希望可以保持住開季強勢，至於客軍就希望打破對方嘅主場不敗身，兼且將雙方嘅積分距離拉近，估計全球「最佳10號」美斯，今戰會同「最佳9號」法卡奧有一番惡鬥。
巴塞最怕穩守突擊

法卡奧上周繼10多年前皇馬射手摩連迪斯後，再喺一場波獨建5功，佢無論近門、遠射、頭槌、12碼，都一樣難佢唔到。可惜法卡奧點樣盡領風騷，都佔據唔到報章嘅頭條，皆因美斯將封塵咗40年嘅梅拿全年入球紀錄打破，已達致球王級別。

除咗法卡奧，馬體會嘅佐治高基上周表現亦光芒四射，除咗造就迪亞高哥斯達同法卡奧入波，佢個人出色嘅好表現，亦印證一手提拔佢嘅教練施蒙尼眼光有幾獨到。

雖然馬體會今季演出神勇，但今戰心態上一定要先放低包袱，唔可以托大玩對攻，事關巴塞近年較失色嘅比賽，對手都係穩守突擊嘅球隊，好似今屆歐聯對些路迪、去屆嘅車路士，連擅攻嘅皇馬近年對巴塞都縮後打反擊，因此馬體會今戰反而要以守行先，等巴塞愈攻愈急，伺機作致命一擊。但無論如何，馬體會今季成績已超標有凸，現時嘅開季成績，不但遠勝當年贏得雙冠王嘅球季，而且更贏盡口碑。

（now632台周一凌晨4:00直播）