AC冇料到攻「細」難求

猪拉多纳

近排小妹晚晚都成點幾先瞓，為咗乜？咪就係為咗林保怡囉！近排無綫喺凌晨重播《讀心神探》，上星期無意中睇咗集，吖，雖然首主題曲真係堅難聽，但套劇真係好好睇喎！小妹以前都讀過心理學，套劇入面嘅理論珍珠都冇咁真，例如換坐姿、摸鼻、眼神虛浮等，係人類大腦活動嘅反映，證明無記班編劇大佬間唔中都肯做吓功課，當林保怡講出呢啲Theory嗰陣，仲好Man好Charm添，如果小妹男朋友好似保怡咁有學識、咁有智慧就好喇，哈！

其實呢，智慧就好多人都有嘅，爭在大家點去應用佢啫，好似AC前鋒羅賓奴咁，一睇個樣就知佢係醒目仔啦！只可惜呢位巴西百厭星淨係掛住諗計整蠱人，狀態沉足兩年都冇起色，對住個空門都可以唔入，難怪畀大陸傳媒封為「單刀不入帝」啦！原本都相安無事o架，好衰唔衰AC教練阿里基無啦啦又用番羅賓奴踢正選，最弊係另一位箭頭柏仙尼又無復當年勇，齋靠艾沙拉維「單天保至尊」，又點會多波入先？
羅賓奴 柏仙尼表現走樣

大家只要睇吓意甲開咧至今，AC米蘭8次喺地頭出擊只得兩鋪開大，就知小妹真係有搵Link睇實「紅黑軍」啦！今晚佢哋又喺地頭聖西路迎戰佩斯卡拉，睇怕都係悶戰一場喇！始終對手實力未夠班，作客7戰有4場食白果，一對中場指揮官巴拉斯同基斯比哥路斯又打埋柴，今鋪造訪AC肯定死守博偷雞啦，咁嘅環境，梗係冷吼2.4倍入球細啦！
微博傳情：食雞煲食上癮

除咗迷上林保怡，小妹近排又染埋「譚仔雞煲癮」，上星期仲足足食咗3次添，勁好味，食極都唔厭囉！早幾日我哋鏢會出嚟Gathering，喺小妹推介下，我哋成班都係去咗「譚仔」，每個隊友歎完個雞煲之後都「直豎拇指」，大家有機會嘅話，不妨去試吓啦！
Sherry推介：AC米蘭 入球細