AC11倍「主其他」炒起佩斯卡拉

猪拉多纳

周日晚有多場意甲舉行，值得留意為AC米蘭主場對佩斯卡拉。近排AC米蘭可謂全面回勇，每次對住弱勢球隊都唔會放軟手腳，數夠幾粒先至肯收手，相信今晚可以喺聖西路球場，以極輕鬆姿態擊敗佩斯卡拉。留意到佩斯卡拉今季對住強隊都採取半放棄態度，今場對AC米蘭隨時連失幾粒，主W熱到辣手欠分頭，巨高進取多少揀11倍波膽「主其他」。

（中央5台周日晚10時直播）
佩軍鍾情進攻足球

佩斯卡拉今季對強隊都係慘敗，早前對國際米蘭及拉素都輸○比三、對祖雲達斯輸一比六、對拿玻里就輸一比五。查實意甲弱隊慣常作風，每逢鬥強隊總係全隊縮晒喺半場，希望悶和對手取攞番一分，偏偏佩斯卡拉好有個性，對住強隊反而去搶攻。奈何球員質素有限，進攻欠銳之餘更導致後防嚴重空虛，所以次次都輸到大大鑊。

AC米蘭經過季初一段低沉期之後，近月走勢明顯轉好，近兩場比賽對住拖連奴及里賈納都能以大比數勝出，相信今場對佩斯卡拉都會全力以赴，務求打起球隊士氣。另外，AC老闆貝魯斯干尼近幾場都帶埋新女朋友到現場睇波，球隊上下為氹貝老闆開心，今場肯定全力大炒佩斯卡拉，令老闆可以喺女友面前威威。