車仔振作有賭未為輸

猪拉多纳

早於五十年代，有套著名西部牛仔電視劇叫做Have Gun-Wil Travel。經過多年演化之後，戲名就變成一句諺語，簡單嚟講即係「有賭未為輸」。其實呢句說話用喺車路士身上最適合不過，車路士本身人腳質素唔差，加上未來仲有幾項錦標可爭，比如足總盃、聯賽盃及歐霸盃，所以車路士球員及球迷根本毋須灰心，球隊仍然有機會爭取一個成功嘅賽季。當然啦，今晚「藍戰士」最緊要贏得世界冠軍球會盃，只要領隊賓尼迪斯打好個底，以後條路就易行得多。Peter就送個錦囊畀車仔老闆阿布以及賓尼迪斯，就係「雷霆救兵奪標今晚夜」，車路士未來半季食粥定食飯，就係睇呢場決賽踢成點。

車路士要爭英超冠軍唔容易，所以唔使將聯賽目標定得太高，入到頭四位已經心滿意足。實在愛華頓、熱刺及西布朗實力都唔及車路士，阿仙奴及利物浦今季又唔多醒神，所以車仔打入頭四位目標應可輕易做到。接住落嚟就要踢好盃賽，大家都知阿布有捧盃癮，若然賓尼迪斯捧幾隻盃返史丹福橋，相信阿布都會滿意。
前鋒線最好斟番魔獸

依家車路士最好就係腳踏實地，踢出簡單實際足球去換取好成績，咪賴叻學人哋玩漂亮足球，唔好忘記車路士能夠贏得歐聯冠軍，就係靠佢哋夠穩打穩紮；攞到好成績卻改變踢法，個人覺得未必係好事。講到一月轉會窗重開，其實車路士亦唔需要大手出擊，只要買個有級數嘅防守中場，以減輕後防壓力就已經足夠，至於前鋒方面，最好梗係叫「魔獸」杜奧巴返嚟啦！

今晚Peter會同球迷一齊欣賞世冠盃決賽，留意巴甲球隊哥連泰斯今季喺聯賽演出唔算標青，點秤都唔及車路士咁好，相信哥連泰斯惡唔出樣，車路士齋W可望順利開出。
金句：Have Gun-Wil Travel