阿布易帥 開始有收成

猪拉多纳

賓尼迪斯上任都有一段時間，車迷已經透過各種方法表達不滿，賓帥除咗用成績嚟回應，可謂別無他法。油王阿布拉莫域向來好要面，賓帥今日爭世冠盃不容有失，捧番個盃向油王交代。車仔一班球員喺社交網透露，球隊依家喺日本好輕鬆冇壓力，更衣室士氣好，再加上賓帥已經有兩次世冠盃決賽經驗，今日再度出擊一定有着數。

雖然賓帥畀人插，但車仔最近確實係穩打穩紮嘅，連勝3場共入12球只失3球。除咗桑馬達繼續大勇外，油王契仔費蘭度托利斯都開始復甦，費托就話歸功球隊踢法直接咗，賓帥果然仲有兩三下散手，佢上場甚至將大衞雷斯推前一格踢防中，效果又出奇理想，油王決定換帥後受盡冷言笑語，但睇嚟開始有些少收成。

唔好忘記車仔仲有秘密武器奧斯卡杜斯山度士，呢位之前踢過聖保羅同國體會嘅巴西球員，對哥連泰斯當然係好熟路，相信亦過咗唔少料畀賓尼迪斯。至於哥連泰斯喺4強表現唔算突出，贏艾阿里只係僅僅熟。今日估計都係照舊以馬斯奧艾馬臣同荷西古里路攻堅，但面對車路士防線再加上門將施治狀態弗，想入波唔易，近5屆世冠盃全數由歐洲球隊奪冠，球迷今日自然識揀啦！
歇冬前捧不來梅W

另德甲踢埋今晚就歇冬，雲達不來梅對紐倫堡將會係壓軸一戰，小妹決定撐主W。紐倫堡近排作客唔掂，近6次作客輸5次，當中只入2球，反觀不來梅今年主場夠醒神，只曾不敵勁旅拜仁同利華，加上一對箭頭尼斯彼德臣同阿拿奧杜域當弗，預期可以幫球隊贏波。