艾阿里蒙特雷冇包袱鬥入波

猪拉多纳

世冠盃今午頭場上演季軍戰，埃及艾阿里鬥墨西哥蒙特雷，季軍戰一向畀人感覺都係多波入，就算近年世冠盃季軍戰唔利開大，波童依然深信呢兩支踢法進取嘅球隊今仗會放開懷抱鬥攻，推介1.75倍大盤。

（有線61及201台周日下午3時30分直播）
名次之爭放膽對攻

以中位數2.5球計，近四屆世冠盃季軍戰有三次於法定時間內開細，點解波童今場咁堅持要反其道而行？首先，艾阿里及蒙特雷本身都係踢法主攻嘅球隊，上場因為受制於兩支實力較強嘅對手哥連泰斯及車路士，踢法變得較保守係可以理解。睇番佢哋喺半準決賽分別淘汰兩支亞洲代表廣島三箭及蔚山現代，同樣靠壓迫性主攻踢法而在比賽初段搶得先機，今場喺冇心理包袱之下，預計亦唔會踢得太龜縮。

其次，蒙特雷上屆雖然未能進身四強，但在第五名遺材賽卻以三比二擊敗突尼西亞代表艾斯柏蘭斯，足證呢班波喺競爭意義不大嘅比賽始終踢得較放，波童估今場開大機會高。