撐車仔登世界1哥

猪拉多纳

費托弗番＋賓帥有運＝客W

世冠盃王者戰今日黃昏喺橫濱上演，歐洲王者車路士決戰南美霸主哥連泰斯，爭奪世界1哥寶座。車仔教頭賓尼迪斯同世冠盃好有緣，兩年前曾帶國際米蘭奪冠，今年率領車路士強勢殺入決賽，撞啱契仔費蘭度托利斯回勇，近3戰省入5粒，有力助車仔捧盃，客勝好路！

（有線61及201台周日晚6時30分直播）
哥連泰斯級數未夠

賓尼迪斯喺一片爭議聲中上「車」，老細阿布咁多人唔揀偏偏揀呢個車迷眼中釘，無非都係為咗激活久沉嘅王子費蘭度托利斯。「肥賓」唔知係咪行運醫生醫病尾，佢帶隊冇耐托利斯就生番晒，近3戰轟入5球，重現超強把握力，雖然同全盛時期比較仲有啲距離，但起碼好得七七八八，唔會再畀車迷鬧係「廢托」。賓尼迪斯兩年前執莫連奴二攤教國米贏咗世冠盃，今次年尾教車路士又撞正有得爭世冠盃，難怪曼聯教頭費格遜都話「肥賓」好命。車路士對上3戰全勝，加埋轟入12球，喺賓帥帶領下，隊內西班牙幫個個上晒力，除托利斯回勇，佢個同鄉桑馬達都頻頻士哥，右閘艾斯派古達愈踢愈好，成班波已經順番晒。

至於南美王者哥連泰斯真正大牌球星唔多，射手荷西古里路上場一箭定江山成英雄，但呢個秘魯前鋒之前喺歐洲搵食只係三線奀星，拍埋車仔班兵度級數明顯差一截。哥連泰斯最值錢球員係防守中場荷西保連奴，呢個新進巴西國腳喺中場好硬淨，盛傳車仔想喺一月搵佢過檔，無論去或留，佢今戰一定會盡力爭取表現。
近5屆歐洲隊贏晒

世冠盃向來係歐洲同南美之爭，過去5屆都由歐洲球隊捧盃，當中只得巴塞隆拿喺09年要戰至加時後先至捧盃，其餘幾支歐洲冠軍都喺法定時間解決對手，包括上屆巴塞以4比0輕取山度士，反映兩洲賽事水平有距離。車路士及時撻着，質態都在哥連泰斯之上，有望贏波捧盃！
近5屆世冠盃決賽戰果

2011 巴塞隆拿(西班牙) 4:0(3:0) 山度士(巴西)

2010 國際米蘭(意大利) 3:0(2:0) 馬贊比(剛果民主共和國)

2009 巴塞隆拿(西班牙) 1:1(0:1) 學生隊(阿根廷)

巴塞隆拿加時勝2:1

2008 曼聯(英格蘭) 1:0(0:0) 利加大學(厄瓜多爾)

2007 AC米蘭(意大利) 4:2(1:1) 小保加(阿根廷)