平手盤捧愛華頓

猪拉多纳

史篤城主場對賽冇優勢

德甲班球員都幾歎，踢埋今輪就可以享受4個星期嘅悠長假期充吓電，相反喺英國踢波嘅就冇咁盞喇，12月個個慶祝聖誕開派對時，佢哋就要為加開快車而奔波，都咪話唔慘！不過逗得咁高人工，梗係要踢返番啲好波回饋球迷啦！今晚英超兩隊作風近似嘅球隊會正面交鋒，由史篤城主場對愛華頓，史篤城雖然主場不敗，但仍然讓唔起對手，馬會只係開出平手盤，由於兩隊實力接近，客隊更值得一博。

（有線304及204台周六晚11時直播）

雖然愛華頓近5場只錄得1勝，但佢哋失分對手係曼城同阿仙奴呢啲前列分子，「拖肥糖」兩場都仍能夠同對手打和1比1已經交足功課。而上仗對熱刺就仲威，2比1贏埋，喺地獄賽程之中能夠保持不敗已經好難得，所以我會認為佢哋近況其實同史篤城差唔多。愛華頓一對中路守將迪斯甸同菲臘積基爾卡絕對有能力應付史篤城嘅高空轟炸，而以「爆炸頭」費蘭尼同謝拉域呢對進攻組合，比起史篤城較為單調嘅進攻策略更具威脅。
地獄賽程保持不敗

史篤城今季喺主場到依家仲能夠保持不敗，反觀愛華頓作客表現只係一般，僅得2勝4和2負，但呢場馬會只係開出平手盤，似乎對史篤城贏波有啲保留喎！睇返往績，史篤城近年來5次主場對愛華頓只係贏過1次咁大把，單講數據就認真麻麻。

再者，史篤城入球數字持續偏低，16場聯賽只係入得14球，平均每場都入唔到1粒，主場所贏嘅對手又唔係乜嘢強隊，因此今場平手盤客隊有7折，真係值得一博嘅賠率，所以即使呢場只係打和，至少都可以全身而退吖嘛！
Wendy推介：愛華頓（平手盤）