拜仁「讓和」「遜」得過

猪拉多纳

高美斯爭正選Show Off

既生瑜，何生亮？拜仁慕尼黑嘅前鋒新貴文迪蘇傑本來係球隊英雄，點知「鋒霸」馬里奧高美斯復出後，佢就突然死火冇波入，今晚拜仁喺德甲主場迎戰慕遜加柏，啱啱甩拖嘅高美斯唔止要當對手好似沙包咁出氣，亦係趁機搶番正選嘅好時機！不過慕遜加柏近排有復勇迹象，拜仁未必讓得起2球，不如捧4.15倍「讓和」啦！

（有線64及204、廣東體育周六凌晨3:30直播）
趁文迪蘇傑啞火爭位

文迪蘇傑今季初加盟後，就因馬里奧高美斯受傷穩佔正選，更喺首12輪聯賽攻入9球之多，堪稱球迷新寵！不過花無百日紅，同樣叫「馬里奧」嘅高美斯上月底復出後嘅6場賽事，文迪蘇傑居然即刻啞晒火，反而高美斯唔知係咪因為立心搶番正選，加埋啱啱同拍拖9年嘅女友分手，化悲憤為力量下喺呢6場轟入3球兼有2次助攻，幾乎仲弗過受傷之前，唔通呢2個「馬里奧」真係相剋？
慕遜加柏回勇失波少咗

唔少德國媒體都認為，文迪蘇傑近況曳，加上之前踢得太密係時候抖抖，主流體育網站《sport1》更預言：「高美斯復出後，文迪蘇傑只可以成為後備殺手！」軒歷基斯2選1嘅話，梗係揀態勇嘅高美斯好過啦！小妹睇好佢同近2場拍住入波嘅湯馬士梅拿再次發威，要破慕遜加柏又有幾難？

至於慕遜加柏，佢哋近4場3戰力保清白之身，德甲作客更4仗不敗，就算火力強如拜仁，都唔係咁易炒到3、4粒，加上佢哋喺馬高列奧斯等主將離隊後，有位老而彌堅嘅艾蘭高擔當「救世主」角色，近3場聯賽2次有進帳，配合埋愈戰愈勇嘅射手漢基，「慕軍」即使輸都未必係任人劏嗰隻，博讓球和或有驚喜。
拜仁主場對賽贏成條街

‧拜仁至今16場德甲只失6球，不過當中5球喺主場失波。

‧慕遜加柏目前8場作客聯賽未試過半場領先，只錄得4和4負。

‧拜仁近10次主場迎戰慕遜加柏取得8勝1和1負極佳成績。