車仔東瀛大特賣

猪拉多纳

肥賓鹹魚翻生勢添食

世冠盃四強壓軸戰由墨西哥勁旅蒙特雷決戰歐洲王者車路士，車仔教頭賓尼迪斯不得民心，今次喺世冠盃唔衰得，「肥賓」契仔費蘭度托利斯及時翻生，兩仔爺齊為前途而戰，實會狂攻爭勝。蒙特雷上場贏得精彩唔會坐以待斃，兩隊鬥攻捧大最好！

（有線61及201台周四晚6時30分直播）

賓尼迪斯接手車路士後一度陷入困境，近期捱過艱難時期，對上兩場全勝兼轟入九球，正式鹹魚翻生！對「肥賓」同車迷嚟講，最開心莫過於見到久沉嘅費蘭度托利斯復勇，呢位西班牙射手近兩戰射入四球，信心返晒嚟，梗係啦，佢契爺安排桑馬達、夏薩特同域陀摩西斯等人全力撐住「王子」，家陣終於順番，相信士哥陸續有來！
蒙特雷做足「攻」課

墨西哥勁旅蒙特雷上場輕取亞洲冠軍蔚山現代，表現相當對辦，呢班波本身有唔少優質進攻球員，其中阿根廷球星施薩迪加度曾經踢過法國勁旅里昂，上仗梅開二度盡顯級數，另外小將捷西斯哥朗拿亦好搶鏡，成班波進攻好爽，雖然隊中另一星級前鋒漢拔圖蘇亞素受傷無緣披甲，但仍然有大把人用，絕對有足夠本錢同車仔鬥攻。

車路士雖然改由防守大師賓尼迪斯領軍，但後防始終都有甩漏，隊長泰利受傷冇隨隊出征，中路防守仍存缺點，今場難保不失，蒙特雷亦唔會縮得太後，雙方或大手交易，要大盤。
日本fans當肥賓係寶

車路士新帥賓尼迪斯自上任後一直不受車仔球迷歡迎，但賓帥帶隊來到日本後人氣爆燈，所到之處充滿歡呼聲，佢坐大巴前往訓練場前，受到大批球迷包圍係咁要攞簽名，搞到好耐冇受到偶像級待遇嘅「肥賓」堅開心，簽名簽到手軟，同喺史丹福橋球場真係差天共地。
蒙帥寸車仔踢法醜陋

蒙特雷教頭禾斯迪治寸車仔：「我哋同最醜陋嘅人跳舞，因為車仔係世冠盃列強中踢得最難睇嘅一隊，希望己隊喺四強踢番場好波喇。」