哥連泰斯兩萬球迷隨軍大陣仗

猪拉多纳

出戰「世界冠軍球會盃」嘅兩隊亞洲球隊廣島三箭同蔚山現代齊齊出局，表現確實令人失望，蔚山現代完全踢唔出水準，落敗無話可說，另一場艾阿里淘汰廣島三箭嘅戰情就比較緊湊，艾阿里有一定攻力，但今日四強戰面對南美盟主哥連泰斯，唔知可唔可以創造奇迹？

艾阿里作為非洲霸主同埃及傳統班霸，個朵聽落好似幾勁，不過憑呢兩個銜頭要捧走「世冠盃」似乎就難啲。不過，隊中位34歲埃及國腳阿布捷卡老而彌堅，呢位進攻中場今年專喺盃賽「士哥」，今晚佢有份出場就有望繼續爭取入球喇！

至於哥連泰斯，南美球隊一向重視「世冠盃」，絕少欺場，呢隊巴西班霸好巴閉，球隊上機前超多球迷送機，據報話有二萬球迷一齊飛去日本打氣，所以球隊更有動力去爭取佳績。
攻破艾阿里冇難度

講乜都假，最緊要係哥連泰斯依家嘅陣容，同當日捧走南美自由盃相差無幾，即使佢哋喺巴甲聯賽hea踢，一樣有唔錯成績，班兵狀態唔錯，只要攻擊組合馬斯奧艾馬臣同羅馬連奴踢出平時水準，哥連泰斯要入波一定冇難度，今仗兩隊都以進攻為主，一於揀入球大啦！

（有線61及201台周三晚6時30分直播）