阿仙奴激情喪攻氹Fans

猪拉多纳

正所謂「知恥近乎勇」，「兵工廠」係時候踢番場爭氣波，加埋西布朗嘅「小小苦楚等於激勵」，兩軍火星撞地球，每次對賽都擦出火花，今晚好可能再為球迷獻上「入球騷」！

球季都未踢到一半，西布朗搶到26分可以話降班冇憂，阿仙奴得21分亦唔使旨意爭英超冠軍，只係諗唔到本來係護級分子嘅西布朗，依家竟然變成阿仙奴爭前4嘅頭號勁敵！
西布朗對賽做慣「大」騷

查實勝敗乃兵家常事，周中歐聯留力輸波亦無可厚非，最弊嘅係阿仙奴輸得冇骨氣，齋計英超，佢哋近6戰失咗12分，激到班粉絲狂鬧一眾「小兵」，批評佢哋「冇腦、冇激情、冇靈魂」，領隊雲格點解畫都冇用，只有入波加贏波至係解藥，呢鋪佢哋冇得揀，一定要喪攻！

對家西布朗之前係威係勢，雖然連贏4場之後跟手輸番兩場，但呢啲只係技術性調整，好正常，對佢哋嚟講，贏幾場同級對手都唔夠砌低一支強隊咁興奮，穩守突擊係西布朗嘅拿手好戲，今晚又有機會同阿仙奴重演近4次對賽「大」合奏！