菲律賓主場首戰難贏「坡」

猪拉多纳

東南亞錦標賽抖咗成個星期，今晚終於進行首場4強首回合大戰，菲律賓喺主場讓唔起新加坡！雖然今戰係菲律賓喺東南錦歷史上首度主場出戰，但新加坡防線回復完整，唔會再出現畀老撾攻入3球嘅場面，1.54倍「讓球客勝」抵捧！

（now670台周六晚8:00直播）

講起東南錦嘅賽制認真特別，分組賽喺泰國同馬來西亞兩個主辦國進行，4強就會踢番主客兩回合淘汰制。上屆菲律賓喺4強對印尼，因為國內冇球場符合規格，失去主場權利，但隨住佢哋嘅黎剎紀念球場升呢，未曾主辦過東南錦嘅菲律賓終於可以主場出戰。可惜對於分組賽輸過畀泰國嘅菲律賓嚟講，主場壓力可能會令佢哋更難踢！後衞謝利盧辛拿又被丹麥球會艾斯堡急call返去，呢場冇辦法候命，主場焗攻仲擇使。
新加坡防線回復完整

相反，新加坡主要由12獅球員做骨幹，默契贏晒，即使近兩場移後踢閘嘅施佳懿，因為家事趕返上海唔踢得，依然有後衞艾斯亞好番，上場有份後備落場，加上左閘艾雲沙亞坐完波監，上場以4:3險勝老撾嘅豆腐後防表現，唔會再出現！
東南亞錦標賽賽制

採主客兩回合淘汰制，今輪為4強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。