皇馬作客欠火讓球和抵博

猪拉多纳

華拉度列近6次主場未輸過

今晚皇家馬德里回歸西甲作客華拉度列，咪使旨意佢哋炒得起！事關「銀河艦隊」今季作客戰績曳，頂多都係小勝甚至輸波，坐鎮主場嘅華拉度列又絕非善類，1.67倍「讓客」絕對博唔過，不如冷敲3.8倍「讓球和」，博皇馬小勝仲好啦！

（now632台周日凌晨3:00直播）

皇馬喺歐聯僅以次名出線，西甲又遭宿敵巴塞拋離11分，今季分分鐘「兩大皆空」！聯賽搞成咁，要怪就怪佢哋作客唔掂，7次外訪居然輸咗3場，除咗5:0大炒馬略卡外，都未試過入多過2球，小妹極之唔睇好佢哋炒得起主場超強嘅華拉度列。
法比奧干查奧又傷過

好彩嘅係，雖然關於帥位更迭嘅傳言滿天飛，但慶幸嘅係成隊波目前似乎幾齊心，沙治奧拉莫斯早幾日就特登喺Twitter擺咗張同各個「派系」隊友食飯嘅相，連盛傳同西班牙人不和嘅比比等「葡語系」分子都有參與，似乎係想靠團結嚟「救亡」喎！加埋C朗近排開心番，皆因佢連續2場入波、打破個人年度入球紀錄外，仲喺西班牙體育頒獎禮獲選為伊比利亞美洲最佳球員，難得威風梗係笑晒口。

雖然皇馬實力超班，但華拉度列同樣唔係好惹，佢哋今季成績突飛猛進，會長卡路士蘇亞雷斯更勁讚教練祖基治比莫連奴功力更強！聽落好似有啲誇張，不過人哋又真係交到貨，連續6次主場都未輸過，對於作客不濟兼有法比奧干查奧打柴嘅皇馬嚟講，想大炒絕對唔容易，小勝一粒都算有交代喇！