韋根遇弱旅唔昆你

猪拉多纳

周末英超有場韋根主場對昆士柏流浪，兩支球隊今季都係以護級為目標，今晚同級球隊互撼肯定砌到盡。雖然話主客雙方實力都比較弱，但點秤都係韋根高少少，話晒今季聯賽都贏過4場，計勝出率唔差得過利物浦及紐卡素，今晚有埋主場之利，好有機會擊敗昆士柏流浪。今場主隊讓平半，度士揀上盤。

（有線303及203台周六晚11時直播）

韋根近兩場聯賽表現確令人失望，但考慮到其中一場對手係上季冠軍曼城，上仗又要作客鬥紐卡素，韋根兩連敗都好難怪。今次回到主場比賽，加上對手係積分榜包尾球隊昆士柏流浪，整個局勢就唔同晒。實在韋根對住下游球隊表現唔錯，早前就憑大勇嘅祖迪高美斯連入三球擊敗雷丁，季初亦贏過修咸頓，今次贏埋另一支弱隊昆士柏流浪都好合理。
昆士柏流浪仲有排執

昆士柏流浪今季喺聯賽仲未打開勝利之門，近兩場對住狀態低沉嘅新特蘭及阿士東維拉都贏唔到，睇嚟呢班波仲有排執。點講都係一支聯賽未開齋球隊，確難令人有太大信心。今場韋根好有機會攞三分，上盤捧得過。