超級多蒙特主場割禾

猪拉多纳

Oliver經常同蘇斯黑柴討論德國波，絕大部分時間都意見一致，但對於今屆德甲冠軍我哋有分歧，黑柴認為拜仁增兵後可以攞番失落咗兩屆嘅冠軍，但我仍然覺得有懸念，多蒙特雖然落後11分之多，但佢哋唔係未試過大落後之下後來居上，呢班波嘅超強潛力冇人可以睇小，今晚主場對禾夫斯堡，我認為可以贏得輕鬆，推介「讓球主勝」。

（有線64台周六晚10時30分直播）

多蒙特今季同上季嘅分別，係更專注於歐聯，喺死亡之組面對英超冠軍曼城同西甲冠軍皇家馬德里，無論主客4場波都踢出令人讚嘆嘅悅目足球，表現連名帥莫連奴都折服，捧佢哋係今屆歐聯奪標熱門。我同意莫帥，原因好簡單：多蒙特嘅級數已經去到歐洲頂級，而且仲不斷提升中！馬高列奧斯同馬里奧葛斯絕對係目前德國最好嘅球員，講到世界足壇嘅新星，好多人都睇好巴西嘅尼馬，但我認為同屬20歲嘅馬里奧葛斯前途更光明，而且唔使等好耐，相信明年佢已經可以步入黃金期。多蒙特歐聯出線後可以專注聯賽追分，今仗喺主場強陣出擊，唔係咁多對手可以抵擋。
禾堡迪亞高上陣成疑

禾夫斯堡炒咗馬加夫後有一段小高潮，近期又見回落，替工教頭高斯拿雖然能夠令球員團結，但球隊組織能力唔高，禾堡嘅新任體育經理K阿羅夫斯正物色名帥領軍，前德國球星同皇馬教頭舒斯達係新目標。禾堡中場靈魂迪亞高喺過去一周一直受膝傷困擾，今場上陣機會唔高，喺目前情況下作客鬥多蒙特難有作為。
Oliver 推介：

多蒙特讓球勝★★★★

拜仁慕尼黑讓球勝★★★★

慕遜加柏大★★★