三箭響頭炮冇「蘭」度

猪拉多纳

一年一度嘅世冠盃今日喺日本展開！由新鮮出爐嘅日職冠軍廣島三箭打頭陣，對住大洋洲代表奧克蘭，有「半個主場」優勢，加上實力、狀態高對手至少一班，小弟認為1.53倍「讓主」可放心捧。

（有線61及201周四晚6:45直播）

日本足球近年嘅國際地位急速上升，全靠一班國腳香川真司、本田圭佑等喺歐洲頂尖賽事發光發亮，地位提升當然備受尊重啦，而且個賽事又係豐田贊助，所以FIFA畀日本經常主辦世冠盃、兼可以派隊出賽係有原因嘅。廣島三箭貴為東道主兼日職代表，自然唔可以丟架，加上佢哋新鮮熱辣啱啱捧走聯賽冠軍士氣高昂，個勢絕對非常對辦。
「半職業」奧克蘭志在參與

三箭今季喺日職表現突出，王牌前鋒兼聯賽神射手佐藤壽人（上圖右）功不可沒，佢今季個人總共入咗22球，多產到就連FIFA官網都有特別推介呢位30歲前鋒，仲形容佢係「日版恩沙基」，擁有敏銳嘅射門觸覺同極高嘅把握力。今晚三箭有呢位神射手在陣，晉級就更有把握！

奧克蘭曾經喺06、09同埋舊年都踢過世冠盃，不過就好打有限，正如教練捷布利斯賽前好坦白話奧克蘭只係半職業隊，絕大部分球員本身都有正職，到出戰世冠盃前先爭取到時間一齊練習，睇嚟今屆亦都係志在參與。
世冠盃賽制

今輪為資格賽，法定時間內打和將加時30分鐘，仍未分勝負則互射12碼決勝。
頂占筍盤：廣島三箭（讓球主勝）