曼城半力 葬身蜜蜂陣

猪拉多纳

留力撼紅魔 歐霸盃席位都唔爭

歐聯分組賽最後一輪賽事今晚搶先進行，多蒙特主場對曼城，2倍主W玩得過！雖然多蒙特喺死亡D組篤定首名出線，曼城要搶分爭踢歐霸盃，但其實「藍月亮」跟手要喺英超硬撼曼聯，對領隊文仙尼嚟講，歐霸盃同英超比較，呢場真係唔搏就死，搏可能死得仲快呀！

（有線61及201周三凌晨3:45直播）
多蒙特基爾養傷 新仔搏命

現時多蒙特喺D組領先皇家馬德里3分，就算今場輸波，都肯定以較佳對賽成績壓倒對方，所以首名出線完全冇懸念。不過，咁係咪代表「蜜蜂兵團」會放軟手腳呢？未必喎！特別係射手羅拔利雲度夫斯基，多蒙特已證實接到祖雲達斯開價正式斟介，成功過檔就有人工加，佢點會唔搏呀？

當然，多蒙特應該唔會用最強陣容應戰，而且隊長基爾仲養緊傷，但佢哋畢竟多年輕球員，無論邊個落場，照道理都會盡力踢好波氹教頭高普開心。相反曼城認真閉翳，目前包尾時落後阿積士1分，今場要全取3分，兼且寄望阿積士贏唔到皇馬，至拎到第3名轉踢歐霸盃，難度都唔細，亂搏隨時嘥彈藥。
藍月亮耶耶托尼停賽

再講，今場曼城有中場耶耶托尼停賽，左閘高拉洛夫剛啱傷埋，再加上緊接要同曼聯進行英超榜首大戰，領隊文仙尼承認陣中4大前鋒表現唔掂，壓力大又有後顧，難免影響發揮。或者冇埋歐霸盃席位，的確會加速文仙尼被人炒魷，但如果呢個禮拜輸畀曼聯，佢即時執包袱都唔奇，家陣等於即時死亡定遲啲死亡任揀，文仙尼應該唔會咁快「慷慨就義」啩，咁嘅情況捧多蒙特穩陣啲！
曼城近戰旺半場細

‧多蒙特主場對英格蘭球隊得3勝3和。

‧蜜蜂兵團歷來歐洲賽入145球、失197球。

‧曼城作客對德國球隊得1勝4負。

‧曼城近9場有7次開半場入球細。
多蒙特搶閘博半場W

假如睇好多蒙特贏波，半場主勝有2.52倍都值得跟進，事關多蒙特啲年輕球員出名鍾意搶閘，特別容易入局，對上9場有7次半場領先，其餘2次打和，最近2場歐聯先後面對皇家馬德里同阿積士，都能夠喺完半場前攻陷對手。既然曼城有左閘高拉洛夫同基捷基治養傷，需要變陣搵薩巴列達頂檔，未必頂到半場o架！