勝利船開攻護級大無畏

猪拉多纳

日職今午煞科！

和都可能要降班，神戶勝利船今日响日職煞科戰主場對出爐冠軍廣島三箭，只有全取3分一條路可以揀，肯定會同客軍放開手腳對攻，1.68倍入球大抵玩。

（now633及660台周六下午2:30直播）
3隊只能活1隊

今季日職嚟到最後一日，唯一仲有競爭性嘅就係爭亞冠盃席位同降班嗰兩瓣，神戶（39分）、大阪飛腳（38分）、新潟天鵝（37分）3隊，今日都要贏波，仲要望競爭對手失分先至甩到身唔使落日乙，3隊裏面神戶嘅生存機率無疑比較大，因為佢哋積分佔先，而且係主場出擊，對手三箭又已經攞咗冠軍，抱住輕鬆心態謝幕。
練波模仿三箭踢法

神戶對今場波非常重視，連日嚟用班後備模仿三箭嘅踢法，進行針對性訓練，呢班陪練仲要刻意着起紫色（三箭嘅主色）練習背心，等班正選嘅作戰思維提早進入狀態。雖然中場田中英雄坐波監，要由三原雅俊頂佢個位，中堅伊野波雅彥又有腳傷，老將吉田考行亦未好得番晒，但係神戶喺主場從來都唔驚三箭，過去12次對碰攞到7勝2和3負，何況今場唔贏唔掂，佢哋實會學大久保嘉人咁講，乜都唔諗一味進攻，絕對有權同hea踢都得嘅三箭，合演一場入球Show。