愛華頓不設防曼城嗒晒「糖」

猪拉多纳

今晚英超曼城坐鎮主場迎戰狀態麻麻兼夾連續10場有失波嘅愛華頓，前線嘅巴洛迪利、阿古路同泰維斯見到仲唔搶住嗒呢粒「拖肥糖」咩，撐曼城2.18倍「讓主」。

（有線200及300、廣東體育周六晚11:00直播）
連續10場失波

雖然曼城隨後喺歐聯對多蒙特，但篤定出局反而無後顧之憂，可以專心衞冕聯賽。再者佢哋係目前英超唯一保持不敗嘅球隊之外，由高柏尼同拿斯達錫呢對中堅拍檔所扼守嘅防線，近6場只失過1球波，後者日前仲寸爆話失1球都嫌多，今場要保持清白之身！就算上場有波入嘅占士米拿或者因傷缺陣，但對於板櫈夠晒深度嘅曼城嚟講根本唔成問題。

至於近8場和咗6場嘅愛華頓，無論作客榜尾嘅昆士柏，抑或主場對中游嘅諾域治都和晒，就連排緊尾2嘅雷丁都可以喺佢哋身上全取3分，睇得出連續10場有失波嘅佢哋狀態幾咁差。而且左閘巴尼斯拉傷大腿倦勤，前鋒謝拉域又感冒初愈，對住如狼似虎嘅曼城睇怕凶多吉少。