韋斯咸車路士做大騷

猪拉多纳

賓帥講明改戰術遷就「費托」

今日係12月1號，即係話英超將進入上半季結算嘅重要月份，隊隊都要積極搶分。今晚又有場「倫敦打吡」，戲碼係韋斯咸主場對車路士，兩隊「水貨」射手誓要踢場爭氣波，1.82倍入球大值博。

（有線200及300、廣東體育周六晚8:45直播）

車路士炒咗冠軍領隊迪馬堤奧，居然惹起班「藍戰士」球迷排山倒海咁做出反對行為。講真呢次換帥表面梗係同迪馬堤奧交唔到好成績有關，但背後原因有傳阿布拉莫域揀賓尼迪斯，係想呢位「費托貴人」可以幫「王子」重生，重現當年佢兩位喺利物浦合作得心應手嘅光輝時刻，故賓帥亦講明嚟緊會採用更適合「費托」嘅戰術。況且呢場係賓帥上「車」後首場作客，之前兩場主場都贏唔到，佢應該好心急要打開勝利之門。
「大傻」高Q大棍踢法啱晒卡路爾

咁啱得咁蹺，當年紅軍高價買嚟頂替「費托」嘅安祖卡路爾愈踢愈沉，今季輾轉借去韋斯咸，好彩遇到最鍾意高Q大棍嘅「大傻」艾拿戴斯，兩個當然係一拍即合啦！卡路爾喺對熱刺嗰場開齋後，信心同表現都有所回升，呢場應可延續。睇嚟今場韋斯咸會挾地利向車仔進行猛烈空襲，雖則唔敢話一定可以搶到分，但有信心佢哋會整場入球騷！
頂占筍盤：韋斯咸（入球大）