馬德里「大」戰 激情對轟

猪拉多纳

「馬德里打吡」爆發！西甲嚟到第14輪聯賽，馬體會居然拋離皇馬8分，佢哋有冇條件爭標，仲要問過今晚對手、同市死敵兼剋星「銀河艦隊」，兩軍硬鬥硬誰勝誰負真係好難講，不過有法卡奧同C朗呢兩位超級前鋒壓陣，入波一定唔會少，中位數3.5球，照捧2.02倍入球大啦！

（now632台周日清晨5:00直播）

雖然皇馬近排接連失利，陣營屢傳不和又好、莫連奴畀球迷噓爆都好，今鋪佢哋對住一向「食硬」嘅馬體會，就點都要收拾心情，唔可以再搞內訌失威嘅！隊長卡斯拿斯率先走出嚟激勵班手足：「馬體會嘅狀態非常好，但對我哋嚟講，呢場絕對係超級極度重要嘅比賽！」的確，「銀河艦隊」上次輸畀同市死敵已經係99年嘅事，相信佢哋冇人想呢個封塵紀錄被「打破」，點都會生生性性踢番場好波嘅！
迪馬利亞被爆侮辱西盃對手

特別係啱啱殺入金球獎最後3強嘅C朗，一定想爭表現希望盡最後努力造勢，望住死敵美斯入完一球又一球，佢都係時候的起心肝，打破4場入球荒喇！而且迪馬利亞被指喺周中場西盃侮辱艾高恩奴球員，搞到本身係皇馬球迷嘅艾軍中場達迪奧斯都話唔再支持皇馬，對於球會聲譽都咪話冇影響，今場「天使」點都要做番齣好戲，挽回班粉絲個心。
法卡奧揚言和波都唔收貨

馬體會可以喺「馬德里打吡」前夕領先死敵8分，亦係自1995至96球季以嚟首次，憑佢哋今季氣勢，同皇馬放手一搏嘅話未必太輸蝕o架！尤其上季因傷錯過咗呢場大戰嘅射手法卡奧可以上陣「斬艦」，佢賽前向西班牙電台《SER》聲稱，絕對唔會滿足於和局，仲寸爆話：「我哋應該團結過佢哋！」配合阿達杜倫同魯爾加西亞呢2位近排入唔少波嘅攻擊手，皇馬條防線未必頂得住o架，今晚大家記得睇呢場入球大戰喇！