三箭攞尾彩鑿沉勝利船

猪拉多纳

日職今午煞科，焦點落喺幾支護級球隊身上，新潟天鵝、神戶勝利船、大阪市雙雄飛腳同櫻花四隊爭兩個位，尾四神戶勝利船今輪主場對住提前奪冠嘅廣島三箭贏波即可上岸，但佢哋過去三個月只贏一場，換帥後未見起色，何德何能讓波呢？蘇豪要「讓球客勝」！

（now 633及660周六下午2時30分直播）

神戶勝利船季前招兵買馬決心爭入前列，五月尾搵埋前大阪飛腳名帥西野朗領軍，點知一樣唔掂，上個月西野朗被炒，替工安達亮領軍經驗唔多，對住個爛攤子束手無策，依家佢哋領先尾三飛腳一分，好危！勝利船擁有大久保嘉人、田代有三及野澤拓也等優質土炮，但班兵失晒信心，近十二戰僅贏一仗，難救！三箭提前做咗日職王者，但唔代表佢哋今場會讓路，佢哋銳氣正盛，就算收起部分主力都高啲，受讓更加抵玩。
櫻花讓唔起前鋒

同日尾三大阪飛腳作客磐田山葉，山葉季尾冇嘢爭近五戰輸四場，飛腳睇落贏面較高，但山葉今季聯賽主場只輸過三次，煞科戰未必太hea，飛腳Ｗ唔值博，呢場不作推介。另一支大阪市球隊櫻花會喺主場對川崎前鋒，櫻花今場和波就可完成護級任務，但佢哋又係愈踢愈沉，今場讓唔起三連勝嘅前鋒，要「讓球客勝」。

另外，尾二新潟天鵝主場對已經降班嘅札幌岡薩多，天鵝形勢被動，就算贏波都要等其他競爭對手失分先有機會逃出生天，但都要盡吓人事，對住弱旅岡薩多拎三分問題唔大，預期可以大勝一場，熱捧大盤。
日職推介

新潟天鵝 大

川崎前鋒 讓球客勝

廣島三箭 讓球客勝