屈福特英冠發威超晒班

猪拉多纳

今日Macot出擊重心揀咗英冠，屈福特主場迎戰班士利，兩支球隊級數同近況都一天一地，我認為屈福特可以輕鬆取勝，1.68倍主Ｗ係信心之選，進取啲可以博埋2.8倍「讓球主勝」。

（周六晚11時開賽）

屈福特擁有悠久歷史同傳統，最風光日子要數番八十年代初期，當時班主係英國著名歌手艾頓莊，曾經攞過英格蘭最高級別聯賽亞軍同殺入足總盃決賽，雖然此後因為財政問題無以為繼而沉淪，但Macot睇到呢支「黃蜂兵團」有中興迹象，甚至有機會喺不久將來重返英超行列。屈福特目前陣中擁有眾多潛質優厚嘅年輕球員，入球能力極高，喺前車路士同拿玻里名將蘇拿執教下，士氣同演出都日見進步，經過近6場聯賽不敗，當中仲包括作客6比1大炒列斯聯同上輪4比1輕取錫周三，聯賽排名由季初嘅20位升到第8，我認為佢哋係目前英冠其中一支狀態最好球隊，只要維持進度，甚至有機會爭取升班資格。
班士利愈踢愈衰聽炒

另一邊廂，班士利近年一直喺英冠下游掙扎，近季都幾經艱苦至護級成功，今季情況亦冇改變，睇走勢可能更差，佢哋出晒名作客唔掂，今季9場作客只得7分，而且狀態奇差，聯賽近8輪不勝合共僅得3分，今晚作客遇上有心爭升班嘅屈福特隨時大敗收場，波膽我貼屈福特贏4比1。
Macot推介：

屈福特勝★★★★

FC東京大★★★★

緬恩斯勝★★★