曼城班底厚開快車拿手

猪拉多纳

周中開快車從來係香港球迷嘅噩耗，皆因捱夜抵冷已經夠慘，最老土係今晚8場英超幾乎同時間開波，曼市雙雄、阿仙奴、車路士全部分途出擊，根本冇可能睇得晒。要搵投X重心筆者就揀咗撐曼城，博佢哋作客砌低韋根，要2.2倍「讓球客勝」。

（有線203及303周四凌晨4:00直播）

今次周中快車有一個特點，就係上周末喺自己地頭出擊嘅隊伍，今晚會繼續有主場之利，無疑略有優勢，不過筆者就認為陣容龐大嘅班霸更有睇頭，畢竟現階段已經步入季中，個別隊伍已經踢到殘殘哋，人腳充裕嘅列強開快車有明顯優勢。

講到人腳鼎盛，曼城肯定係No.1，上場出完阿古路搭迪斯高，今次就可以用泰維斯同巴洛迪利攻堅，上場打後備嘅拿斯尼亦會擔正，車輪戰問你點頂！相反韋根就有翼鋒馬隆尼同中堅拉米斯打柴，門將艾哈比斯近期又慌失失，都幾難頂得住「藍月亮」。
紐卡素跌watt撐史篤城

講到近期最跌watt嘅英超球隊，不得不提紐卡素，佢哋雖然近乎徹底放棄歐霸盃，但一樣踢到殘晒，搞到聯賽3連敗，中場最可信嘅卡比耶同賓艾化都先後打柴，前線孖寶柏比斯施斯及丹巴巴亞亦告走樣，今晚作客出晒名體力強嘅史篤城，當然係要1.88倍主W。

（有線62周四凌晨3:45直播）
足球重心：曼城（讓球客勝）、史篤城（勝）

馬膽推介：7場(8)真誠真意

上季出戰谷草1200已經顯示出無比後勁，今季更多添一份主動，今仗面對實力見底嘅「強風駿馬」及排外檔嘅「勝利大將」，有望爭取跨季3連勝。