紅魔扑錘做「細」界

猪拉多纳

朗尼落柯打要唔失波

上場再度後上反勝嘅曼聯，今晚英超快車繼續喺奧脫福出戰，面對不擅作客兼遇着「魔鬼快車賽程」嘅韋斯咸，講明首要任務係做好防守嘅朗尼，以穩為先入波唔會多，3.5球中位數嘅1.72倍入球細有望開出。

（有線200及300、廣東體育周四凌晨4:00直播）
韋斯咸殘陣難捱魔鬼賽程

曼聯上場反勝昆士柏流浪換走老將史高斯係轉捩點，38歲嘅佢明顯跟唔上比賽節奏，反而路爾斯安達臣入替後注入活力，無論防守定攻守轉換都快得多。表現搶鏡嘅佢今晚更罕有獲費Sir指明打正選，落到場必加多兩錢肉緊。拍住久休復出即有波入嘅費查，就算拿尼同路爾斯華倫西亞養傷，要由艾舒利楊格串演右中場，但對住韋斯咸應付有餘。

再者韋斯咸自07至08年起4個球季，作客奧脫福全部輸波收場，今季由英冠升番上嚟應該都無力扭轉命運，加上佢哋面對緊「魔鬼快車賽程」，接連作客熱刺同曼聯後，仲要喺主場迎戰車路士同利物浦，今晚華斯迪同班拿約繼續缺陣，中場核心麥克盧保又坐波監，相信佢哋會識得取捨，疊埋心水留番主場先搏殺啦！