阿仙奴翻嗒拖肥

猪拉多纳

快車夜戰遇私房菜

今晚英超快車，人衰行路打倒褪嘅愛華頓，又咁唔好彩，撞正「技術流」剋星阿仙奴，整定冇運行。唔好唔信格食格呀，雖然「兵工廠」近五作客未贏過，但該隊近年對親「拖肥」，無論主客都分外醒神，近十次對賽未嘗一敗，加上中場新星韋舒亞傷愈復出後，表現突出，斯維信佢哋可借嗒糖反彈，平手盤捧客軍坐和望贏。

（有線301及201台周四凌晨3時45分直播）

愛華頓給人感覺係硬橋硬馬，實而不華，該隊唔怕曼聯、車路士，但最驚就係阿仙奴，由於技術上嘅劣勢，令「拖肥」經常畀班廠員控波在腳搓到暈，形成近年戰績處於下風。

「兵工廠」唔單止近十戰「拖肥」未輸過，最近五次造訪葛迪遜公園球場，贏足四次，更不乏4比1或6比1嘅大手交易，證明愛華頓始終技遜一籌。
韋舒亞抖夠孭飛

論近況，季初異軍突起嘅愛華頓，近七場只係贏得一仗，明顯立晒油，對住諾域治同雷丁，因守將於比賽末段異常唔集中，搞到被逼和甚至反勝，令主帥莫耶斯頭都痕埋。

另一邊廂，阿仙奴之前連勝兩仗，雖然上仗領隊雲格特登收起中場韋舒亞，搞到畀阿士東維拉悶和，但側面反映「小王子」今仗可抖夠上陣，在法國中場戴亞比仍未康復下，活力十足嘅韋舒亞，確係可分擔阿迪達的串連任務之餘，亦可與辛迪卡索拉輪流助攻，使鋒線嘅普多斯基、基奧特獲得更多輸送，加上翼鋒謝雲奴復出，令阿仙奴火力更盛。愛華頓咁黑仔，難得開出平手盤，梗係捧阿仙奴喇。