皇馬超班半場大得起

猪拉多纳

皇馬今晚主場出戰西班牙盃第4圈次回合，雖然近排多次傳出主帥莫連奴教埋今季就走頭，但丙組仔艾高恩奴實力上有明顯分野，首回合對住半力嘅皇馬唔夠砌實屬意料之內，今場作客嚟到巴拿貝更加唔使講，隨時未企穩陣腳就失波，1.68倍半場大捧得過！

（now632台周三凌晨4:30直播）
艾高恩奴千名球迷隨隊

繼前皇馬會長卡達朗指莫帥意興闌珊，日前《阿斯報》亦指習慣未雨綢繆嘅莫帥，並冇為皇馬下季鋪路，藉此推斷佢到出年夏天就會離隊。雖然種種迹象顯示莫帥走頭嘅成數唔低，不過正如《機密報》尋日所言，佢未必會立刻走人。繼續由莫連奴領軍嘅皇馬，之前排出卡卡、賓施馬同荷西卡利祖等球員半力出戰首回合，輕描淡寫就帶住4:1嘅領先優勢，就算嗰場正選上陣嘅防中艾辛今晚受傷唔出得，相信形勢依舊會一面倒。

首回合主場出戰嘅艾高恩奴，將比賽包裝到成個嘉年華咁款，最終由中場格蘭特破蛋，相信球員同球迷已經收貨。就算今晚有大約1千名球迷入場撐愛隊，但對住巴拿貝球場8萬幾名皇馬球迷，班未見過大場面嘅艾高恩奴球員，隨時畀佢哋浩大聲勢嚇窒，未企穩陣腳就畀皇馬大屠殺。

首回合：皇客勝4:1
西盃賽制

採主客兩回合制，現為第4圈次回合。兩回合計打和將計算作客入球優惠，未分勝負則於次回合法定時間後加時30分鐘，加時階段仍計算作客入球優惠，再和則互射12碼決勝。