防爆冷防馬田斯

猪拉多纳

皇馬兩周前作客利雲特，幾經辛苦先至僅勝2:1，喺西班牙傳媒口中，場波似打水球多過似踢波，今晚就輪到巴塞作客挑戰利雲特，期望草地質素會有所改善。

對於巴塞嚟講，利雲特嘅主場絕對係一大考驗，皆因近年對賽，「地上最強」就只曾喺07/08球季作客大勝，當時係憑亨利大演帽子戲法。上季交手巴塞作客雖然都可以全取3分，但過程備受爭議，最終憑藉美斯下半場中後段嘅梅開二度，最終反勝2:1。現時巴塞準備打破皇馬喺91/92球季創下嘅12勝1和嘅最佳開局，而美斯就絕對係創造歷史嘅關鍵。

利雲特近況認真唔錯，教練馬天尼斯嘅穩守突擊戰術發揮得淋漓盡致，除咗主場僅敗畀皇馬1:2外，上周作客亦以2:0擊敗拉科，近6周西甲取得4勝1和1負，當中喺打吡戰擊敗華倫，更睇得到利雲特嘅防守體系極為出色，有力爭奪歐洲賽席位嘅行列。

今周利雲特防線雖有柏度盧比斯停賽，但前線單天保至尊的馬田斯狀態甚勇，上周除咗攻入一球、更加直接導致拉科嘅門將艾蘭蘇比亞領紅被逐，家陣佢貴為利雲特嘅首席射手，亦係球隊反擊的第一點，巴塞要防爆冷就要盯實佢。