錘仔幫「客勝」拔「刺」

猪拉多纳

大Sam教波硬淨又實際

上周喺北倫敦打吡2:5輸畀阿仙奴嘅熱刺，今晚會喺白鹿徑迎接另一場倫敦打吡，對手係表現愈嚟愈好嘅韋斯咸。唔講可能大家唔會留意，原來韋斯咸目前喺聯賽榜排名高熱刺1位，可想而知今季呢支升班球隊喺領隊「大Sam」艾拿戴斯麾下， 踢出既硬朗又實際嘅足球。相反，熱刺由領隊到球員嘅名氣雖然較大，但係演出忽龍忽蟲， 海鮮波到痹以致成績未如理想， 今場對住踢法硬朗兼紀律性高嘅「錘仔幫」， 贏唔贏到係一大疑問，所以「張峰」今場對2.25倍「讓球客勝」信心十足。

（有線201及301周一凌晨0:00直播）
熱刺艾迪巴約停賽踢法單調

熱刺上周對兵工廠雖然頭威頭勢，由艾迪巴約先開紀錄，點知呢位射手之後一記粗野攔截，畀球證驅逐離場，正一神又係佢鬼又係佢，連累踢少個嘅熱刺最後大敗收場。今晚艾迪巴約停賽做座上客，熱刺前線會由迪科爾一個撐起，配合艾朗連儂同加利夫巴利等速度型球員喺前線搵食，表面睇嚟就唔錯嘅，可惜踢法單調，踢反擊還可以，但對住防守為先嘅球隊要強攻就往往會老鼠拉龜，今晚佢哋嘅對手韋斯咸正正就係呢類防守型球隊，熱刺贏唔贏到都成疑問。

「錘仔幫」今季返到英超，踢到呢個階段表現愈見成熟，隊長路蘭表現更加值得嘉許，佢喺禁區埋門觸覺敏銳，亦經常參與防守減輕後防壓力。至於麥克盧保演出亦較之前成熟，傳送到家嘅同時又成日果斷阻截對手來襲，成為「錘仔幫」防線第一道屏障。兩人今晚只要交出應有水準，熱刺應該都幾難喺韋斯咸身上搵到着數，梗係撐受讓嘅「錘仔幫」划算啦！
張峰來料：韋斯咸（讓球客勝）