馬拉加華倫疲兵交鋒盞獻「細」

猪拉多纳

又歐聯又聯賽，有時強隊真係唔易做，好似馬拉加（圖右）同華倫西亞咁吖，啱啱先喺歐聯戰場搏殺完，今晚又話要重返西甲戰線，一隊攰到甩轆，一隊就天殘地缺，睇怕都唔慌多波入，1.72倍入球細好路呀！

（now632台周日凌晨3:00直播）
華倫射手蘇爾達杜坐波監

馬拉加可以話係否極泰來，季初話陷入財政危機，點知班球員就夠晒爭氣，成功喺歐聯分組賽突圍繼續搵銀幫補球會。雖然話佢哋暫且可以將火力放番喺聯賽，但啱啱周中先同辛尼特激戰完，來回用咗10個鐘飛成7,000公里有多，聽講班球員攰到唔想操咁滯，睇嚟謝晒喎！

對家華倫西亞周中鬥拜仁係就喺主場出擊，唔使舟車勞頓，弊在佢哋傷兵問題嚴重，除咗話中場加高、後衞馬菲奧同荷奧彭利拿全部打柴之外，就連首席射手蘇爾達杜都要坐波監，入球能力大減之餘仲話要作客，憑咩同馬拉加駁火呀？