千葉市原齊心o趙三神

猪拉多纳

日乙升班附決賽

日乙升班附加賽決賽今日喺東京國立競技場舉行，由大分三神對千葉市原，雖然三神射手森島康仁上場食出大四喜威到震，但市原高層已講到明，只要能夠成功升班，教練木山隆之保證可以留隊繼續玩，相信能夠以士氣壓倒對方，1.92倍客勝捧得過！

（開賽時間：周五中午12:00）
大分三神焗攻好易出事

今場波受到全日本球迷注目，J-League「特命經理人」足立梨花都會湊熱鬧入場為兩隊打氣。三神近4仗有3勝1和，包括上場附加賽以4:0大炒京都不死鳥，最勁係森島康仁連入4球，而且最近受傷患困擾嘅前鋒李東明同林丈統，據講已經傷勢好轉可以候命，可惜呢個賽制係假如打和，排名較高嘅千葉就會升班，即係話三神今鋪一定要焗攻，隨時偷雞唔到蝕渣米。

千葉狀態比三神更Sharp醒，上仗附加賽淨數FC橫濱後連贏4場，前鋒藤田祥史更加連續3場有波入，腳風唔差得過對家嘅森島康仁。

最重要係，之前有消息話市原一升班就會搵原本執教日本奧運隊嘅關塚隆領軍，但日前高層已作出澄清，公開話根本冇諗住過橋抽板，即使升上日職，都會畀勁得民心嘅教頭木山隆之繼續玩，難得班高層咁識做，一眾千葉球員應該會畀心機幫木山保住份工。
日乙附賽制

今輪為決賽，法定時間內打和，排名較高球隊將會獲得升班資格。