熱刺唔追素 玩細不攻

猪拉多纳

今晚歐霸J組榜首大戰，拉素主場迎戰熱刺，曾効力過呢兩隊的前英格蘭球星加斯居尼唔嫁又嫁，一度因健康問題拒絕做觀眾的「肥仔嘜」，決定應拉素之邀前赴羅馬睇波。雖然有貴賓蒞臨，但雙方出線形勢樂觀，隨時hea踢等收工，呢場捧細盤最好。

（有線61及201台周五凌晨2時直播）
和波都願 留力英超

今季拉素大踢進攻足球，尤其主場出擊，其4141陣式非常煞食，不過該隊早已將目標鎖定聯賽前三的歐聯席位，並堅持輪換政策，因此在歐霸會出部分副選，踢法亦冇咁進取，首循環作客熱刺就悶和0比0，加上現時以8分高踞榜首，今場唔輸緊要過贏波，預計以穩守為先。

熱刺對歐霸有一定野心，不過該隊近三仗聯賽輸晒，領隊保亞斯備受壓力，嚟緊周末英超先係主菜，今場未必太搏，相信和波已係理想戰果。以熱刺上兩場分組賽作客彭拿典奈高斯及馬里博爾打和1比1嘅戰局睇，呢個細盤今晚絕對追得過。
拉素贏波取首名

拉素今晚贏波便能鎖定首名出線，相反若熱刺贏波，而另一邊廂馬里博爾作客彭拿典奈高斯失分，熱刺即提早出線。