紅軍「大」腳解圍

猪拉多纳

「喪B」年青人作客照搶

「哨牙蘇」落場搏殺數胡，「大」得起瑞士「喪B」！歐霸盃A組利物浦主場惡鬥年青人，領隊羅渣士會多派主力上陣，攻力倍增；年青人4戰共炮製19個入球，為分組賽48支球隊最多，今仗捧大！

（有線61及201台周五凌晨4時05分直播）

利物浦本季擺明重英超輕歐霸，但分組賽目前打到關鍵階段，依家以1分落後榜首安治排第二，紅軍話唔想出線就假。加上上次主場對安治，蘇亞雷斯、謝拉特、紐尼沙軒、丹尼爾艾格都有上陣，故有理由相信呢班主力今場都會落場。「哨牙蘇」近期着晒火入波頻頻，目前正領先英超射手榜，年青人條三流防線又點頂得住？加上有首循環梅開二度嘅「光頭仔」舒維爾，以及喺歐霸演出特醒嘅達寧，紅軍要喺晏菲路入兩、三球唔難。
年青人有前冇後指數冠歐霸

年青人（Young Boys）呢支瑞士球隊打法正宗有前冇後打死罷就，首循環主場對利物浦，雖然紅軍出大量小將及二線兵，但年青人一樣攞唔到甜頭，最後輸3比5。就憑呢種打法，年青人對上兩場分組賽兩勝烏甸尼斯，一場贏3比1，一場贏3比2，齋睇比數就知癲鳳鬥狂龍。此外，佢哋4場分組賽入9球失10球，所產生嘅入球數字為分組賽48支球隊中最多，值得追大。
利安齊贏就搞掂

A組形勢緊湊，榜首安治有7分在手，領先榜尾烏甸尼斯3分，同組利物浦同年青人目前各得6分，只要安治今場擊敗烏甸尼斯，利物浦又贏年青人，兩軍就可以一齊出線。