C朗數胡搶金球

猪拉多纳

C朗為爭金球獎，今仗要入波搵曼城洩憤！近期呢名天之驕子狀態麻麻，入球數字被美斯遠遠拋離；係人都知佢好勝心超強，今仗必施展渾身解數。過往11次鬥曼城，C朗只要入波，其所屬球隊就必定勝出，今次莫連奴肯定求神拜佛，希望愛徒士哥。

C朗近4場比賽只係入得1球，皇馬雖大勝畢爾包同薩拉戈薩，但佢都冇士哥；而鬥利雲特雖然入波，但就被批爆眼角，認真黑仔。金球獎結果公布在即，C朗肯定搏命爭取表現，今次曼城或成犧牲品。
入親波例贏曼城

以往代表曼聯，依家効力皇馬，C朗曾11次披甲鬥曼城，當中戰績為7勝1和3負，當中佢攻入4球並有2球助攻。最犀利係佢一入波，曼城就一定輸。4球中有2球係絕殺入波，首循環佢於完場時射破赫特十指關，帶領皇馬贏3比2，相信大家都記憶猶新。